www.NazarNews.kg NazarNews - дүйнө назарында! www.NazarNews.kg NazarNews - в центре мирового внимания! www.NazarNews.kg NazarNews - dünya gözünüzde! www.NazarNews.kg Биздин байланыш: +996 779 028 383 www.NazarNews.kg Email: nazarnews.kg@gmail.com www.NazarNews.kg WhatsApp кабар: +996 779 028 383 www.NazarNews.kg
Бейшенбек Бекешов: "Сапарчик, сары, бала, балашка" деп теңсинбегендер абдан жаңылышат"

Гүлжан Шерипбаева 16-май 2018, 09:14

Саясат


Бейшенбек Бекешов: "Сапарчик, сары, бала, балашка" деп теңсинбегендер абдан жаңылышат"

Сапар АШАнын “АЛТЫН КАДРЫ”. Аны Сапарчик, сары, бала, балашка деп теңсинбегендер бери эле дегенде абдан жаңылышат. Бекер киши таз болбогондой эле сарынын баары Сапар болбойт. Сапар издеп тапкан жана ишке ашыра билген долбоорлор башкалардын түшүнө да кирбейт. Башкалар сөздү сүйлөп жатканда мындай суперкадрлар ишти гана жасайт. Болгондо да баарын басып өтөөр, атаандаштын баарын тыптыйпыл кылып тепсеп салаар ишти.

Ээсинин ниет-куюн илгиртпей түшүнүп, асмандан тилегенин жерден даяр кылып турган андай “алтын кадрларды” кайсы кожоюн кимге алмаштырат эле!?

Болбосо Датка-Кемин чубалгысы же ЖЭБди жаңыртуу сыяктуу уурунун уурусу мындай турсун, каракчынын каракчысы суктанаар долбоорлор “алтын кадрлардын” оюна келбесе, катардагы пенденин башына сыябы?!

Алардын канча акча турарын, ал кимден алынып, канчасы ишке, канчасы кимге кетээрин учурунда ким билип, ким укту эле? Арамы авария менен курсагын жарып чыкпаганда, балким, эч ким эч нерсе билбей калмак. Кайран эл кантип кимден кош бойлуу болуп калганын билбей, теңселип турмак. Арам перзенттердин аталары “алтын кадрлар” экенин го билдик. Эми төрөтү кантээр экен деп жиндеп турган чагыбыз. Булар “алтын” кадрлардын отчеттуу иштердеги ишмердиги.

Толгон мекендештерибизди набыт кылып, Дача-Суу айлына кыйрап түшкөн жүк сыяктуу отчетсуз иштери канча экенин ким билди? Шериктештик өлкөлөрүнүн экономикасындагы “кыргыз тешиги” баарынын чарбасын бүлүнтүп жатканы тууралуу Лукашенконун билдирүүсүнө караганда мунун көлөмү эбегейсиз зор.

Дүйнөдө сойку өлкө атыгуудан өткөн кордук барбы? “Алтын кадрлардын” баасы биздин бийлик эгелери үчүн эгемендүүлүк алгандан бери өтө жогору. Аскар Акаев башында андайды кыргыздан таппай эл аралык шылуундардан жалдаган.

Кийинчерээк ошол деңгээлге өсүп жеткен аппарат башчысы анын каалаган элдин баары эркин кирип-чыгып турган эшигин биротоло жаап, акаевдик бийликтин ирип-чирүү дооруна негиз салган. Курманбек Бакиевдин андай кадры болсо раматылык болуп кетти, арбагын козгоп сөз кылбай эле коёлу.

Кыскасы, “алтын кадрлар” бийлик ээсинин чыныгы жүзү, керек болсо өзү. Ошондуктан алар, Текебаевдин сөзү менен айтканда, алар үчүн өз баласынан да артык көрүнөт. Ошондуктан, аты-жытын эч ким билбеген кимдир бирөө элдин ырыскысын тейлөөчү кызматка татыксыз барып калганын көрсөңөр эч талашсыз эле “алтын кадр” механизми иштеди деп эсептей бергиле.

Бейшенбек Бекешов, тележурналист

Булак: NazarNews.kg


Бөлүшүү

Жаңылыкка болгон эмоцияңыз

Жаңылыкка болгон эмоцияңызды билдирүү үчүн өз атыңыз менен кириңиз!



Ой-пикирлер (0)

Ой-пикир жазуу үчүн өз атыңыз менен кириңиз!

Азырынча бир дагы ой-пикир жазыла элек. Сиз биринчи болуп жазыңыз!
Биз Telegram'да

NazarNews.kg эми Telegram'да! Биздин жаңылыктарды эми Telegram каналыбыздан окуй аласыздар.

Бизди Telegram'дан @nazarnewskg деп издеңиздер жана каналга жазылыңыздар!

Telegram Channel: @nazarnewskg

NazarNews'та жарнама!

NazarNews порталына жарнама орнотуу үчүн бизге кайрылыңыз!

+996 779 02 83 83
+996 779 02 83 83